Isasar-ong sadiay Bagani Ubbog…

baganiubbogVisitTLPITI BAGANI UBBOG. Dagiti fellows ken panelists ken dadduma pay a timmabuno iti Pasnaan 6 iti papanda panagpasiar iti pagtaengan daydi Reynaldo A. Duque iti Bagani Ubbog, Candon, Ilocos Sur. Kinaragupda ti ading ni RAD a ni Cenon A. Duque Jr. (nakatakder, maikapito manipud kanawan) a nangted pay kadagiti sangaili iti napapateg a libro ni RAD (No Agsuratka Iti Sarita, GUMIL Filipinas Directory Of Ilokano Writers, ken GUMIL Filipinas: 25 A Tawen). Agpakanawan, nakatakder: June Agsi Gaygayed, Dr. Jaime G. Raras, Estela Bisquera-Guerrero, Edmundo A. Bisquera, Mercy Vergara-Yabes, Derick Marcel F. Yabes, Gynelle D. Follante, Ena Macabunga-Viloria, Vilmer V. Viloria, Apo Cenon, Dr. Freddie P. Masuli, Roy V. Aragon, Marie Rose Quitoriano-Rabang, Joseph C. Ganabo, Rhea Rose D. Berroy, ken Daniel L. Nesperos. Agpakanawan, nakamasngaad: Nestor Gonzales, Jimmy R. Agustin, Aldrine C. Molina, Ronnie E. Aguinaldo, ken Danilo B. Antalan (Rinetrato ni Paulene G. Gacusan)

Posted in ilokano, ilokano people, ilokano writers, writers, writers' group, writers' workshop | Tagged , , , , , | Leave a comment

Dua a libro iti Tagnawa Series ti GUMIL Filipinas para 2016, maisagsagana

Maisagsaganan dagiti libro a paset ti proyekto a panagipablaak ti GUMIL Filipinas, ti Tagnawa Series, nga iwardas ti Editorial Committee ti gunglo.

Buklen dagitoy ti antolohia ti ababa a sarita nga editen da Roy V. Aragon, direktor ti GF ken chairman ti nasao a komite, John B. Buhay, premiado a mannurat, ken Neyo Mario E. Valdez, PRO ti GF; ken ti antolohia dagiti daniw ni ayat nga editen da Cles B. Rambaud, editor ti Bannawag, ken Ariel S. Tabag, poetry editor ti Bannawag ken sekretario-heneral ti GF.

Manamnama a mairuar dagiti libro iti 2016.

Pagalagadan iti panagidatag:

1. Iti sarita, dua ti idatag; iti daniw, agingga iti lima. Nasaysayaat no di pay naipablaak ti idatag ngem mabalin met no naipablaaken iti magasin, wenno dadduma pay a babasaen wenno iti Internet. No naipablaaken, masapul nga adda notasion iti baba ti sinurat mainaig iti detalye ti pannakaipablaak daytoy. Maysa laeng ketdi a sarita ti maipablaak, ken segun iti pangngeddeng dagiti editor. Mabalin met nga agingga iti lima ti maipablaak iti daniw, segun kadagiti editor. Karbengan dagiti editor ti di mangipablaak kadagiti maidatag a sarita wenno daniw a di makapatar iti pagrukodanda, ken iti sabsabali pay a makaigapu.

2. Uray ania a sarita ti idatag, nawaya ti tema a suraten, ken iti tradisional man wenno eksperimental a wagas. Maipalagip a saan a pakpakatawa wenno makapakatawa a sarita ti idatag. Iti biang ti daniw, maipanggep iti ayat (romantiko wenno eros) ti idatag a daniw.

3. Mapakuyogan dagiti sinurat iti pakasaritaan ti biag ti autor (saan nga at-atiddog ngem maysa wenno dua a parapo), karaman dagiti contact information (adres, numero ti telepono/selpon, e-mail). Pakuyogan iti kaudian a retrato iti .jpeg a file format.

4. Ipatulod babaen ti e-mail dagiti sinurat a sarita iti rvaragon@gmail.com, ken daniw iti asseng.tabag@gmail.com.

5. Masapul a maawat dagiti sinurat iti di naladladaw ngem Disiembre 31, 2015.

6. Agdalan dagiti sinurat iti naiget a panagarisit dagiti editor. Mapakaammuan dagiti autor a mairaman iti libro makabulan kalpasan ti naituding a deadline.

7. Maipablaak dagiti libro iti wagas a tagnawa, wenno panidna, bayadanna. Masuktanto ketdi iti libro a ti bilangna, agbatay iti kaibatogan ti naitagnawa a gatad.

8. Karbengan dagiti editor nga editen dagiti sinurat a naidatag.

9. Para iti dadduma pay a detalye, makiuman kadagiti editor babaen dagiti e-mail address iti ngato.

Posted in books, fiction, ilokano, ilokano poetry, ilokano writers, language, poetry, publishing, short story | Tagged , , , , | Leave a comment

PASNAAN 6: Panagpitpit ken Panagtenneb iti Agdadamo a Pluma iti Ili ni Isabelo Abaya: Panangnanam iti Kaimasan a Kalamay ken Kornik ken Panangtunton iti Dalan nga agpa-Bagani Ubbog

01

Dagiti fellow ken panelist ti Pasnaan, kaduada ti sumagmamano nga opisial ti GF ken alumni ti Pasnaan. Sango, agpakanawan: Anna Liza M. Gaspar, GF Director ken Pasnaan 5 alumnus; Jerry B.A. Malamion, Sangguniang Panlungsod Secretary ti Candon City; Estela Bisquera-Guerrero, GF Auditor ken panelist; Cles B. Rambaud, Bannawag Managing Editor ken panelist; Juan Al. Asuncion, Bannawag Literary Editor ken panelist; Daniel L. Nesperos, panelist; ken Ronnie E. Aguinaldo, Pasnaan 5 Most Outstanding Fellow. Nakatakder, agpakanawan: Ariel S. Tabag, Bannawag Poetry Editor ken workshop director; Dr. Freddie P. Masuli, GUMIL Cagayan president ken workshop moderator; June Agsi Gaygayed, fellow; Donna Joy Wagayen, fellow; Marie Rose Quitoriano-Rabang, fellow; Arthur P. Urata, Sr., GF President; Dr. Jaime G. Raras, dean ti Teacher Education ti NLPSC; Aldrine C. Molina, fellow; Ena M. Viloria, workshop moderator; Joseph C. Ganabo, fellow; Edmundo A. Bisquera, fellow; Kisses M. Ganapin, fellow; Gynelle D. Follante, fellow; Derick Marcel F. Yabes, Pasnaan 2 alumnus; Mercy Vergara-Yabes, Pasnaan 4 alumnus; Jimmy R. Agustin, fellow; Nestor Gonzales, fellow; ken Reynaldo E. Andres, mannurat ti Bannawag.

NAANGAY ti maikanem a Pasnaan, ti literary workshop para kadagiti agsursurat iti Ilokano a tinawen nga isaysayangkat ti GUMIL Filipinas, iti Siudad ti Candon, Ilocos Sur babaen ti panangsangaili ti North Luzon Philippines State College (NLPSC, dati a University of Northern Philippines-Candon).

Immuna a naangay ti Pasnaan, idi 2011, sadiay Currimao, Ilocos Norte babaen ti panangsangaili ti DepEd ken GUMIL Ilocos Norte iti uppat a daras.

Nayakar ti workshop idiay Gonzaga, Cagayan idi 2014, babaen ti GUMIL Cagayan ken Cagayan State University-Gonzaga.

Sa ita a tawen, itay Sep. 10-12, iti Ilocos Sur, iti ili ti bannuar nga Ilokano a ni Isabelo Abaya ken itan, nangruna nga am-ammo a siudad a pakaar-aramidan ti kaimasan a kalamay ken kornik.

Iti pannakairugi ti programa iti umuna nga aldaw ti workshop, sinarabo da Candon City Mayor Ericson G. Singson (maysa a Doktor iti Medisina) ken NLPSC  College of Teacher Education Dean Dr. Jaime G. Raras dagiti agpasnaan ken dagiti timmabuno nga opisial ken kameng ti GF nga indauluan da GF Presdient Arthur P. Urata Sr. ken GF Director Cagayan Provincial Board Member Vilmer V. Viloria.

Nairaman kadagiti dimmar-ay dagiti baro nga opisial ti GUMIL La Union nga idauluan ni Eddy Almodovar.

Sangapulo a maibilang nga agdadamo a mannurat ti mapilpili a fellows iti tunggal edision ti Pasnaan. Iti Pasnaan 6, nainayon kadagiti aganayen a 50 nga alumni ti workshop da: Jimmy R. Agustin ti Abulug, Cagayan (daniw a para ubbing); Edmundo A. Bisquera ti Urdaneta City, Pangasinan (daniw); Gynelle D. Follante ti Pamplona, Cagayan (daniw a para ubbing); Joseph C. Ganabo ti Candon City (sarita); Kisses M. Ganapin ti Galimuyod, Ilocos Sur (daniw a para ubbing); June Agsi Gaygayed ti Ilocos Sur (daniw); Nestor Gonzales ti San Nicolas, Ilocos Norte (daniw), ken Aldrine C. Molina ti Ilocos Sur (sarita); Marie Rose Quitoriano-Rabang ti Vigan City (sarita); ken Donna Joy Wagayen ti Ilocos Sur (sarita).

Nagpaay met a panelist da: Cles B. Rambaud, Juan Al. Asuncion, Roy V. Aragon, Joel B. Manuel, Daniel L. Nesperos, Estela Bisquera-Guerrero, Neyo Mario E. Valdez, Junley L. Lazaga, Danilo B. Antalan, ken Vilmer V. Viloria (guest panelist).

Iti maudi nga aldaw ken panagleppas ti workshop, kalpasan ti makapaksuy met iti panunot ken bagbagi nupay naragsak ken pasaray naserioso a panagpinnitpit ken panagtenneb iti pluma, nagpasiar dagiti nagpasnaan iti away a nakalatlataken iti mapa ti literatura iti entero a pagilian: iti Bagani Ubbog.

Dinanon dagiti fellows ken panelists ti lugar ken pagtaengan a nakayanakan ken timmanoran ni Reynaldo A. Duque ket nalabsanda ti Bantay Gidday ken napagnaanda ti dalan nga agturong iti Kalimugtong ken kangrunaanna nakasangoda a mismo ti maysa kadagiti agbibiag kadagiti sinurat daydi Apo Duque, ni Cenon Duque Jr. a kabsatna. Naibatay kenkuana ti maysa kadagiti karakter iti nobela a “Centerly, Manong!” a naipablaak iti Bannawag .

Makuna a nagasat unay dagiti fellow a naisar-ong  iti Bagani Ubbog ta maysa daytoy a peregrinasion iti maysa a “sagrado a lugar ti Literatura nga Ilokano.”

Saanto ngarud a malipatan daytoy a gundaway a naangay ti Pasnaan iti Ilocos Sur. Mapadpadaanan ngarud no sadino ti sumaruno a pakaangayan ti workshop, ti Pasnaan 7. Nagasatto latta met dagiti mapili manen a sangapulo a fellows a maadalan ken maidalan iti agtultuloy a panagbasbas iti dana para iti nadurdur-as pay a panagsurat iti kabukbukodan a literatura. #

03

Nakigrupo dagiti sumagmamano nga opisial ti GF nga idauluan ni GF President Arthur P. Urata Sr. ken dagiti fellow ken panelist ti Pasnaan 6 ken ni Candon City Mayor Ericson G. Singson (tengnga) kalpasan ti panangpadanon ti ama ti siudad kadakuada iti Siudad ti Candon.

05

Iti panagbitla ni Mayor Ericson G. Singson a nangpadanonna kadagiti mapasnaan ken agpasnaan iti Siudad ti Candon, lugar dagiti maingel a bannuar, nalalaing a mannurat, ken naimas a kalamay ken kornik.

09

Ni NLPSC OIC-President Dr. Severino G. Alviento iti panangpasangbayna kadagiti agpasnaan.

10

Ni Dr. Andres T. Malinnag, Jr., NLPSC Director for Finance and Administration. iti pammaregta a bitlana.

06

Iti pannakapadayaw ti Most Outstanding Fellow ti Pasnaan 5, ni Ronnie E. Aguinaldo (katengngaan). Agpakanawan: Dr. Freddie Masuli, Ariel S. Tabag, R.E. Aguinaldo, Arthur P. Urata, Sr. ken Dr. Jaime G. Raras.

07

Sakbay ti workshop, nangipaay iti lektiur ni Editor Cles B. Rambaud maipapan iti Ortograpia nga Ilokano a dinar-ayan ti adu nga agad-adal iti NLPSC.

12

“Para iti kape a pamigsa nga agpuyat nga agsurat!” dayta ti baro nga “Ikkis ti Candon” ni Dr. Jaime G. Raras (kakanigidan) a nangidaulo iti pannakaitag-ay dagiti coffee mug a nakaimalditan ti seal ti NLSPC ken insagut ni Dr. Elizabeth M. Gacusana ken ti NLSPC Student Government kadagiti fellow ken panelist. Agpakanawan: Dr. Raras, Ariel S. Tabag, Dr. Freddie Masuli, Roy V. Aragon, Estela Bisquera-Guerrero, Dr. . Severino Alviento, Dr. Andres T. Malinnag, Jr., Board Member Vilmer V. Viloria, Cles B. Rambaud, Daniel L. Nesperos, Neyo Mario E. Valdez, Danilo B. Antalan, Ena Macabunga-Viloria ken Mercy Vergara-Yabes.

13

Dagiti Pasnaan 6 fellow, kaduada ni Pasnaan 6 Workshop Director Ariel S. Tabag.

14

Dagiti fellow, kaduada ni Dr. Jaime G. Raras ken dagiti estudiante iti NLPSC a nagpaay a secretariat iti workshop. Sango, agpakanawan: Chester Daryll Bargas, Paulene G. Gacusan, Ryan A. Evangelista, Joseph Europa, Louiella Cortez ken Joanna Sagun. Dagiti fellow (likud, agpakanawan): June Agsi Gaygayed, Jimmy R. Agustin, Edmundo A. Bisquera, Donna Joy Wagayen, Kisses M. Ganapin, Gynelle D. Follante, Marie Rose Quitoriano-Rabang, Nestor Gonzales, Joseph C. Ganabo ken Aldrine C. Molina

***

Iti pannakapitpit ken pannakapikpik dagiti gapuanan dagiti fellow:

15

Iti umuna nga aldaw ti workshop, madlaw ti panagkebbakebba dagiti sangapulo a fellows bayat ti pannakaikuto ken pannakayitta dagiti sinuratda a mapagaadalan ken maamiris.

16

17

18

19

20

21

22

DSC_0070

DSC_0072

DSC_0074

DSC_0076

DSC_0077

DSC_0133

DSC_0134

DSC_0135

DSC_0145

DSC_0146

DSC_0159

***

26

Ni Donna Joy Wagayen iti panagsaritana kalpasan a na-worskshop ti saritana. Adda iti kanigidna ni Gynelle D. Follante; ni met Kisses M. Ganapin ti adda iti kanawanna.

28

Ibingbinglay ni Rhea Rose Domasing Berroy, alumnus ti Pasnaan 4, dagiti padasna iti panagsurat kalpasan a nagdalan iti Pasnaan Workshop. Malaksid a nakaipablaaken iti sumagmamano a daniw, sarita ken salaysay iti Bannawag, inyalatna pay ti umuna a gunggona iti salip iti sarita ti AMMAFLA idi 2014 ken isu ti kakaisuna a nangabak (maikatlo a premio) iti salip ti sarita nga Ilokano iti Carlos Palanca Literary Awards iti 2015.

 

Posted in criticism, education, ilokano, ilokano people, ilokano writers, writers' workshop | Tagged , , , , , , , , , | Comments Off on PASNAAN 6: Panagpitpit ken Panagtenneb iti Agdadamo a Pluma iti Ili ni Isabelo Abaya: Panangnanam iti Kaimasan a Kalamay ken Kornik ken Panangtunton iti Dalan nga agpa-Bagani Ubbog

Maikalima a Pasalip ALVIYA iti Sarita (2015-2016)

11230651_10205648767557085_1149132754582851958_n

Ipakaammo ti Secretariat ti ALVIYA Literary Foundation nga agawaten kadagiti sarita  paara iti Maikalima a Pasalip ALVIYA (2015). Naluktan ti pasalip idi Abril bayat ti Kombension Nasional ti GUMIL Filipinas. Esponsoran daytoy ni Alex V. Yadao, maysa a Patron ti Literatura Ilokana a tubo ti Libertad, Abulug, Cagayan ngem agdama nga agnanaed iti siudad ti New York iti Estados Unidos.

Daytoy a pasalip ket nairanta para iti itutulong iti panagrangpaya ken panangpasiken pay iti Literatura Ilocana a maysa kadagiti kangrunaan a panggep ti nasao a foundation. Imatonan daytoy ni Dr. Freddie Pa. Masuli ti Cagayan State University ken pakitinnulongan ti GUMIL Cagayan.

Dagitoy dagiti pagalagadan ti nasao a pasalip:

1. Daytoy ti maikalima ken maudi a pasalip para iti umuna a siklo ti Pasalip ALVIYA. Kalpasan daytoy, addanto Grand Finals a pagsasalipan dagiti amin a nangabak manipud umuna a pasalip agingga iti maikalima. Mapilinto ti maysa a Grand Winner para iti Umuna a Siklo. Agpatingga ti panagawat ti Secretariat kadagiti amin a maisalip a sarita inton Pebrero 29, 2016.

2. Silulukat ti pasalip kadagiti amin a mannurat nga Ilokano ken uray pay kadagiti saan nga Ilokano ngem makasurat iti pagsasao nga Ilokano.

3. Nawaya ti makisalip a mangpili iti ania man a tema a kayatna a suraten.

4. Agatiddog ti pakisalip iti 10-25 a panid iti short bond paper, nai-computer (agusar iti Times New Roman, Font Size 12) iti doble espasio ken addaan maysa a pulgada a margin iti amin nga igid ti bondpaper.

5. Maysa laeng a sarita ti mapalubosan nga isalip ti kada mannurat a makisalip.

6. Nasken a bukod a putar ti autor ti maisalip, saan pay a naipablaak iti ania man a magasin, ken saan a patarus manipud iti ania man a lengguahe.

7. Ti laeng parbo a nagan ti autor ti agparang iti manuskrito a maisalip. Mapakuyogan ketdi ti opisial nga entry iti maysa pay a dokumento a nakailanadan dagitoy: Paulo ti sarita, parbo ken pudno a nagan ken kabibiag ti autor agraman numero a pakakontakan kenkuana.

8. Ipatulod dagiti dua a dokumento (sarita ken ti impormasion maipanggep iti autor) babaen iti elektroniko a wagas (e-mail) iti daytoy nga e-mail account : freddie.padua.masuli@gmail.com.

9. Nasken a maipatulod iti secretariat dagiti dua a dokumento iti saan a naladladaw ngem alas-11:59 ti Pebrero 29, 2016 (oras iti Filipinas).

10. Ania man a pangngeddeng a mabukel dagiti hurado ket agtalinaed a kasta malaksid no maduktalan a nasalungasing ti Pagannurotan Bilang 6. Awananto metten ti autor iti gundaway ken pribelihio a sumalip pay kadagiti mapasungad a pasalip ti ALVIYA.

11. Makipagtagikua ti ALVIYA Literary Foundation dagiti mangabak a sarita nupay addaan latta iti karbengan ti author iti copyright daytoy. Maaddaan pay ti agpasalip iti karbengan a mangipablaak kadagitoy mangabak a sarita iti ania man a wagas a kayatna nga aramaten karamanen iti elektroniko ken tradisional a wagas ti panagipablaak.

12. Dagiti Gunggona : First Prize – P15,000.00; Second Prize – P10,000.00 ken Third Prize – P5,000.00 ken tallo a consolation prizes a sag-P2,000.00. Addanto met maited a sertipiko kadagiti amin a mangabak.

13. Maiwaragawag dagiti mangabak a sarita iti umuna a lawas ti Abril 2016. Mayawat dagiti premio kadagiti autor bayat ti GUMIL Filipinas National Convention inton Abril 22-24, 2016 idiay Luna, Apayao.

Posted in fiction, ilokano writers, literary awards, short story | Tagged , , , , , , | Leave a comment

FREE EBOOK DOWNLOAD: Tarabay iti Ortograpia ti Pagsasao nga Ilokano 2012

The Ilokano Orthography Guide developed by various Ilokano writers, linguists, journalists, educators, cultural workers and other stakeholders of the Ilokano language, is now made publicly accessible online and is free to download for printing and dissemination. This Guide is the one endorsed by the Komisyon ng Wikang Filipino (KWF)  which published it in 2012. It was developed as a resource material for the implementation of the Department of Education’s K-12 curriculum with the integration of MTB-MLE or Mother Tongue-Based Multilingual Education.

The Tarabay can be accessed/downloaded here.


 

Posted in ilokano, ilokano people, ilokano writers, language, mass media, mother language education, mother tongue-based education, publishing, translation, writers | Tagged , | Leave a comment

Salip iti Ababa a Sarita ti Mayor Carlito F. Pentecostes, Jr. Awards for Ilokano Literature (Mayor CFPJ Awards), naluktan

Naluktan ti umuna a panagpasalip iti panagsurat iti ababa a sarita ti kabbuangay a Mayor Carlito F. Pentecostes, Jr. Awards for Ilokano Literature wenno Mayor CFPJ Awards para kadagiti propesional ken agdadamo a mannurat nga Ilokano.

Esponsoran daytoy ni Mayor Carlito Fidel Pentecostes, Jr. ti Gonzaga, Cagayan ken ti kaingungotna a ni Mrs. Marilyn S. Pentecostes, babaen ti pannakitinnulong ti GUMIL Cagayan.

Dagiti pagannurotan:

1. Naluktan ti salip idi Hulio 1, 2013 ken aggibus iti Nobiembre 30, 2013.

2. Silulukat ti salip kadagiti amin a mannurat nga Ilokano ken uray pay kadagiti saan nga Ilokano ngem makasurat iti pagsasao nga Ilokano (Iluko wenno Iloko). Dua a kategoria ti salip: 1.) para kadagiti propesional wenno beterano a mannurat, ken 2.) para kadagiti agdadamo a mannurat. Maibilang nga agdadamo ti mannurat no awan pay nasursurok ngem tallo a naipablaakna nga ababa a sarita (short story), iti man Ilokano man wenno sabsabali pay a pagsasao, kadagiti naimaldit (printed) a pagbasaan a kas iti magasin wenno pagiwarnak nga addaan iti nasional a sirkulasion, kas koma iti Bannawag, agingga iti pannakalukat ti salip.

3. Nawaya ti makisalip a mangpili iti tema wenno topiko a kayatna a suraten.

4. Agatiddog ti ababa a sarita iti 10-25 a panid iti short bond paper, naikompiuter (MS Word document) iti doble espasio (agaramat iti Times New Roman font, size 12), ken addaan espasio wenno margin a maysa a pulgada iti amin nga igid ti papel wenno document file.

5. Maysa laeng a sarita ti mabalin nga isalip ti tunggal mannurat.

6. Nasken a bukod a putar ti autor ti maisalip, saan pay a naipablaak iti ania man a printed a pablaakan, saan pay a nangabak iti ania man a kita ti pasalip, ken saan a naipatarus manipud iti ania man a lengguahe.

7. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken pakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor. Mabalin met nga ipatulod ti pakisalip babaen ti e-mail (soft copy ti pakisalip a sarita, ken bionote ti autor).

8. Ipatulod ti pakisalip iti daytoy nga adres: Salip iti Ababa a Sarita, Mayor CFPJ Awards, c/o Roy V. Aragon, Block 34 Lot 5, Wonderland Homes, Iguig, 3504 Cagayan. No met iti email, ipatulod iti: mayor.cfpj.awards@gmail.com. Nasken a maawat ti contest secretariat ti pakisalip iti di naladladaw ngem 11:59PM (oras iti Filipinas) iti Nobiembre 30, 2013.

9. Pinal ti pangngeddeng dagiti hurado ken maibabawi ti gunggona ti mangabak no maduktalan kalpasanna a sinalungasingna ti Pagannurotan Bilang 6. Awanto metten ti karbengan ti naglabsing nga autor a makisalip kadagiti sabali pay a pasalip ti Mayor CFPJ Awards.

10. Dagiti gunggona: Propesional: Umuna a Gunggona: ₱10,000; Maika-2 a Gunggona: ₱7,500; ken Maika-3 a Gunggona: ₱5,000. Agdadamo: Umuna a Gunggona: ₱7,000; Maika-2 a Gunggona: ₱5,000; Maika-3 a Gunggona: ₱3,000; ken dua a Consolation Prizes a sag-₱2,000. Maikkan pay iti sertipiko ti pammadayaw amin a mangabak. Mabalin a makissayan ti bilang dagiti mangabak no iti biang dagiti hurado ket awan makapatar iti bukodda a pagbatayan iti panangpilida kadagiti mangabak. No kasapulan, mabalinda met ti mangparnuay iti sabali a gunggona.

11. Agbalin a makipagtagikua ti Mayor CFPJ Awards kadagiti mangabak a sarita. Ngarud, kas iti autor, maaddaan ti esponsor iti karbengan a mangipablaak kadagiti mangabak a sarita iti ania man a wagas a kayatna karamanen ti elektroniko ken tradisional a wagas ti panagipablaak.

12. Mapakaammuanto dagiti mangabak no kaano ken sadino ti pakapadayawanda ken pakaitedan dagiti premioda.

~~~~~

Posted in fiction, literary awards, short story | Tagged , , , , | 2 Comments

‘Balay ti GUMIL’ iti Suso Beach, Sta. Maria, Ilocos Sur, maituloy

Ituloy ti GUMIL Filipinas (GF), ti gunglo dagiti mannurat nga Ilokano iti Filipinas ti pannakabangon ti “Balay ti GUMIL” iti Suso Beach, Sta. Maria, Ilocos Sur.

Daytoy ti napagnunumuan dagiti kameng ti GF Board nga idauluan ni GF President Arthur P. Urata, Sr. iti naangay nga special meeting ti gunglo idi Hunio 23, 2013 sadiay Narvacan ken Sta. Maria, Ilocos Sur.

Maibatay iti napagnunumuan, agpaay a library ken agamang kadagiti gapuanan dagiti kameng ti gunglo. Maawaganto daytoy iti “Dr. Godofredo S. Reyes Memorial Hall” babaen ti pammalubos ni Dr. Dedicacion A. Reyes a kaingungot daydi Dr. Reyes.

Narugian a nabangon ti pasdek iti sakup ti 162 a metro kuadrado a lote nga indonar dagiti agassawa a Reyes.

Iti sabali a bangir, angayen ti gunglo ti maikadua a regular board meeting-na ita a tawen inton Agosto 24 babaen ti panangsangaili ni Estela Bisquera Guerrero, auditor ti GF, iti pagtaenganda iti Tuding, Itogon, Benguet.

Iti daytoy a miting a maidatag iti GF ti tarigagay ti ania man a provincial chapter a mang-host iti sumaruno a kombension. (Rey Andres)

(Naipablaak iti Bannawag, Hulio 15, 2013 a bilang.)

Posted in ilokano writers, news, writers, writers' group | Tagged , , , | Leave a comment

5th Pasnaan Literary Workshop ti GUMIL Filipinas, silulukaten

Pasnaan 4

Dagiti fellows ken panelists ti Pasnaan 4: Nakamasngaad, agpakanawan: Roy V. Aragon (Panelist), Daniel L. Nesperos (Panelist), John B. Buhay (Panelist), Ariel S. Tabag (Workshop Director), Junley L. Lazaga (Panelist), Joel B. Manuel (Panelist), ken Jual Al. Asuncion (Panelist). Nakatakder, agpakanawan: Reynaldo E. Andres (Moderator), Juan S.P. Hidalgo Jr. (Panelist), Alain F. Razalan (Fellow, sarita a para ubbing), Rosario A. Bingayen (Fellow, daniw a para ubbing), Mercy Vergara-Yabes (Fellow, daniw), Rhea Rose D. Berroy (Fellow, daniw), Florenda L. Pedro (Fellow, daniw), Gorgonia B. Serrano (Fellow, sarita), Roselyn C. Campano (Fellow, daniw), ken Ronelyn B. Ramones (Outstanding Fellow ti Pasnaan 3). Adda iti likud da Arthur P. Urata Sr., GUMIL Filipinas President; ken Io M. Jularbal (Fellow, sarita). Saan a nairaman da Cles B. Rambaud (Panelist), Estela Bisquera-Guerrero (Panelist) ken Derick Marcel F. Yabes (Moderator).

Ipakaammo ti Seminar-Workshop Committee ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-Taaw) nga agawaten iti aplikasion para iti 10 a mapili a fellow para iti 5th Pasnaan Literary Workshop (Pasnaan 5).

Ti Pasnaan ti bersion ti GUMIL Filipinas iti dua a nalatak a literary workshop iti pagilian— ti U.P. National Writers Worshop ken ti Silliman Writers Workshop.

Kas iti Pasnaan 4, uppat a benneg ti literatura ti mapagiinnadalan iti Pasnaan 5: ti sarita (para nataengan ken para ubbing) ken daniw (para nataengan ken para ubbing).

Makiddaw a tunggal aplikante a fellow, pumili iti kayatna a benneg a pakiinnadalan. No sarita, mangidatag iti dua a sarita; no daniw, mangidatag met iti uppat a daniw.

Dua a fellow ti mapili a para iti benneg ti daniw a para ubbing, dua met iti sarita a para ubbing; tallo iti sarita ken tallo met iti daniw.

Idatag dagiti sinurat babaen ti e-mail iti: pasnaan.secretariat@gmail.com, cc: asseng.tabag@gmail.com. Iraman iti sinurat ti ababa a pakasaritaan ti biag ken kaudian a retrato. Maipaayan ti tunggal fellow iti libre a transportasion agraman board ken lodging.

Kinuna ni Arthur P. Urata, Sr., presidente ti GUMIL Filipinas, a mabalin nga iti Cagayan ti pakaangayan ti Pasnaan 5 ken sangailiento daytoy ti GUMIL Cagayan. Masirsirpat ti umuna a lawas ti Pebrero 2014 a pannakaiwayatna, kas panangrambak metten ti GUMIL Filipinas iti Nailian a Bulan ti Arte.

Para iti nayon nga impormasion, ag-e-mail iti pasnaan.secretariat@gmail.com, cc: asseng.tabag@gmail.com.

(Naipablaak iti Bannawag, Hulio 8, 2013 a bilang.)

Posted in ilokano people, ilokano writers, writers, writers' workshop | Tagged , , , | Leave a comment

2 libro nga Ilokano, nangabak iti National Book Award

Ti tropeo nga inabak ti Karapote ni Ariel S. Tabag, kas National Book Awardee iti Fiction (Ilokano Short Stories).

Iti umuna a gundaway, nainominar kas finalists ken nangabak ti libro nga Ilokano iti National Book Awards nga immatonan ti National Book Development Board (NBDB) ken ti Manila Critics Circle (MCC). Sigud a dagiti laeng naipablaak a libro a Tagalog ken English ti mapadpadayawan iti daytoy nga award-giving institution a nakabase iti Manila. Malaksid iti Ilokano, nairaman metten iti kallabes dagiti libro iti dadduma pay a regional languages a napadayawan, kas iti Sebuano ken Bikol.

Lima a libro nga Ilokano a sinurat dagiti Ilokano ti napili kas finalists iti nadumaduma a kategoria: Karapote: Antolohia Dagiti 13 a Nasuerte a Sarita ni Ariel S. Tabag a nominado iti Ilokano Fiction; Samtoy: Dagiti Saritami Ditoy, Ang Aming mga Kuwentonga impatarus ni Ariel S. Tabag (Filipino Anthology); ken 29 A Napili A Sarita Iti Iluko,inedit da Juan Al. Asuncion, Ariel S. Tabag, ken Efren A. Inocencio, Kastoy Nga Imbunubonmi Dagiti Balikas (Antolohia Dagiti Daniw Iti Iluko), inedit da Joel B. Manuel ken Ariel S. Tabag; Nabalitokan a Tawid: Antolohia Dagiti Napili a Sarita Dagiti Ilokano, inedit da Juan Al. Asuncion, Joel B. Manuel, ken Ariel S. Tabag, (agpapada a nominado para iti  Ilokano Anthology).

Iti awarding ceremonies a naangay itay Noviembre 17 iti National Museum, Manila, nangabak ti dua a libro, ti Karapote ken ti Nabalitokan a Tawid. 

Dagiti editor ti Nabalitokan a Tawid, da Ariel S. Tabag, Joel B. Manuel, ken Juan Al. Asuncion, ken ti sertifico ken tropeo ti pammadayaw nga inatiw ti libro. (Ladawan courtesy ni Asseng)

Winner, Ilokano Anthology, National Book Award

Winner, Ilokano Fiction, National Book Award

 

(Kompleto a listaan dagiti a nangabak)

 

:::::

Posted in books, ilokano, literary awards, news, publishing | Tagged , , , , | Leave a comment

Libro dagiti dandaniw a para ubbing, mayalnag

Mayalnag ti Bullalayaw ken Dadduma pay a Daniw para Ubbing, antolohia dagiti daniw a para ubbing ti Grupo Bullalayaw inton Dis. 8, 2012, 7:30-10 a.m. iti Ballesteros West Central School, Centro West, Ballesteros, Cagayan iti panangsangaili da Mario A. Rosario ken Dr. Silvino B. Siddayao, prinsipal ken district supervisor, kas panagsaganadda.

Nainaw ti nasao a proyekto iti panggep dagiti mannurat a Cagayano a makitinnulong iti panagrangpaya ti K to 12 Curriculum kangrunaanna iti MTB-MLE a programa ti Department of Education (DepEd), malaksid iti agtultuloy a pannakaparangpaya ti Literatura Ilokana ken ti pannakapatibker ti pannakausar ti nariingan a pagsasao kadagiti umun-una a grado iti pagadalan elementaria.

Buklen ti Grupo Bullalayaw dagiti kangrunaan a mannaniw iti Cagayan ken iti kabangibangna a probinsia ti Kalinga, a kaaduan kadagitoy ti kameng ti GUMIL Cagayan.

Nagpaay nga editor da Johmar R. Alvarez, Roy V. Aragon, Dexter M. Fabito, Freddie Pa. Masuli ken Ariel S. Tabag. Immaldit met ti Saniata Publications.

Paset ti nasao a panagyalnag iti Christmas Program ti GUMIL Cagayan nga idauluan da GC President Arthur Urata ken GF Vice President Vilmer Viloria a maangay inton Disiembre 7-8 iti Usita’s Beach Resthouse, Cabuloan East, Ballesteros, Cagayan iti panangsangaili ti pamilia da Board Member Jessie ken Lanie Usita ken iti pannakitinnulong da Engr. Rolando G. Torida ti DPWH ken Alex V. Yadao ti ALVIYA Literary Foundation.

Kadagiti interesado a tumabuno iti panagyalnag wenno gumatang iti kopia, mabalin a kontaken dagiti sumaganad a numero para iti reserbasion: 0948-986-4481 (F.P. Masuli), 0918-682-6330 (A.S. Tabag), 0906-967-0519 (D.M. Fabito), 0917-618-1377 (J.R. Alvarez) ken 0917-649-7154 (R.V. Aragon). (Freddie Pa. Masuli)

(Naipablaak iti Bannawag, Disiembre 3, 2012 a bilang.)

Posted in books, education, ilokano poetry, k-12, language, mother language education, mother tongue-based education, poetry | Tagged , , , | Leave a comment