Homo Sapiens

Poem by Roy V. Aragon, from the book ALIMPATOK – Anthology of Ilokano Erotic Poetry. Read by Mighty C. Rasing with Ariel S. Tabag and Jox Maranion of the Manong Diego band. Performed during the launching of the book at Mt. Cloud Bookshop in Baguio City on August 3. 2012.

Agalimpatoktayon! No kayatyo ti maaddaan iti kopia ti nasao a libro, sarungkaran ti page-na iti Facebook.

homo sapiens

agay-ayamta, kunam, makita ita ken mapaneknekan
ti pudno a lalaki, ti pudpudno a kinamalalaki kadata.
ad’toy ti paltog, .44 a magnum a rebolber, russian roulette
balaak iti maysa, puligosem ‘ta bolana, kunam, ket siak
ti umuna a mangideppel iti sentidok, siak ti umuna a mangkalbit.
ay, adda met bukodko a bala, kunak, balaak met, saan la a sika,
rebbengna a dua ti balana daytoy paltog a pangay-ayamtat’ biagta.

shoot! kunam, ala, balaantan iti dua, ala, agbinnatogda, mabibiit
ti ay-ayam, puligosemon a puligosen, sipatem, sipatem, kasta!
siakon! kunam ket indeppelmon iti pispismo ti murdong—klik!

immisemka. sika met, kunam ket pinatayyekmo a pinatayyek
ti bola ti rebolber samo inted ket intutokko iti pispisko,
kinalbitko—klik! immisemak, pinatayyekko, innalam manen, ngem
itan saanen nga iti pispis—inammolam ti ngiwat ti paltog, inay-ayam
ti dilam ti barrel-na, nairut ti petpetmo iti putanna idinto a dimo insina
ti nakapungpungay a matam iti agkurkuridemdem a langak,
pinatayyekmo a pinatayyek ti dua a bala, insubom, minulmolam

ti nalamiis a landok, ninutnotmo, pinabaram—siak ti pudno
a lalaki, kunam, siak! ket in-inut a kinawitmo ti gatilio ti insakmolmo
nga ay-ayammo. wen, sika ti pudpudno a lalaki, kunak, ket nagkidemak
iti nairut—nayugyog ti abagak, naganug-ogak—iputokmo, iputokmon…!

klik!

This entry was posted in books, culture, ilokano poetry, music, original ilokano music, performance poetry, poetry, poetry reading, writers' group and tagged , , , , , . Bookmark the permalink.



Leave a Reply

Your email address will not be published. Required fields are marked *