daniw ken samiweng: Baro a blag ti daniw ken musika nga Ilokano

Naluktan ti maysa pay a blag a “pakaipaskilan dagiti kaudian a partuat, gannuat, pasamak ken damag iti daniw ken musika dagiti Ilokano,” ti daniw ken samiweng. Inlungalong ken tartarawidwidan daytoy ni premiado a mannaniw Ariel S. Tabag, poetry ken entertainment editor ti Bannawag Magazine. Malaksid a mannaniw, maysa pay a musikero ni Apo Tabag.

Iti pannakaipresentar ti blag, kuna ti blogger:

Kabagis met laeng daytoy dagiti immun-unan a blog ken website nga impatakder/mi ken dagiti pada a mannurat a kas kada Roy V. Aragon ken Mighty C. Rasing– ti basirepublic.blogspot.com ken ilocanopoetry.net. Adda slash-na daydiay “impatakdermi” gapu ta isuda dagiti admin ket timmulongkami laeng iti pannakainawna iti panunot ken ar-arep-ep.

Ita, inkeddengko ti nangipatakder iti sabali. Wenno nangipasngayak iti kabagisda, kunak, man tapno saan a maisabsabali.

Ta dagiti adda iti ngato, nalawlawa ti masakupanda gapu ta sirsirpatenna ti sibubukel a landscape ti Daniw Ilokano ken Performance Poetry iti Amianan. Nupay dagiti makitayo ditoy, mabalin a makitayo sadiay; ket dagiti makitayo sadiay, makitayo met ditoy.

Daytoy Daniw ken Samiweng, panggepna ti agbalin a lakasa dagiti agdama a maparpartuat ken mapartuatto a Daniw Ilokano, Musika Ilokana ken Ilokano Performance Poetry. Mabalin a mabasayo ditoy dagiti naipablaaken kadagiti magasin wenno libro, wenno dagiti ibilangtayon a klasiko a Daniw ken Samiweng nga Ilokano.

Kasta met a pamunganayan dagiti maipablaak a libro iti Daniw.

Kasta met a pagsulbodan dagiti baro a kita ti Daniw. Ken Musika. Ken Performance Poetry.

Maysa daytoy nga entablado para kadagiti Ilokano a Mannaniw, Musikero, Performer.

Maysa met daytoy a kamera iti mapaspasamak iti lubong ti daniw ken musika ken performance poetry iti Filipinas ken iti Lubong.

Kangrunaanna, maysa daytoy a personal a rebolusion iti Daniw Ilokano. Iti Musika Ilokana. Iti Performance Poetry.

Ket kadagiti kakadua itoy a rebolusion, kas kadagiti innaganak iti ngato ken dagiti diak pay innaganan, agyamanak iti pannakikammaysayo, Kakadua.

Lugayan ken suportarantayo ngarud daytoy a gannuat!

This entry was posted in ilokano, ilokano people, ilokano poetry, music, performance poetry, poetry, poetry reading, writers and tagged , , , , . Bookmark the permalink.



Leave a Reply

Your email address will not be published. Required fields are marked *