Komperensia ti GUMIL Filipinas, maangay iti Abril 20-22 sadiay Bacnotan, L.U.

Angayen ti GUMIL Filipinas (GF), ti kangrunaan a gunglo dagiti mannurat nga Ilokano iti sangalubongan, iti pannakitinnulong ti National Commission for Culture and the Arts, ti GUMIL Filipinas National Conference and Literary Seminar-Workshop inton Abril 20-22, 2012 iti Don Mariano Marcos Memorial State University (DMMMSU)-North La Union Campus, Bacnotan, La Union iti tema a “Ni Mannurat a kas Mannursuro,” kas naammuan iti naudi a miting ti Hunta Direktiba ti gunglo itay nabiit.

Maawagan pay iti Dap-ayan 2012, daytoy ti maika-44 a nailian a panagtataripnong dagiti mannurat nga Ilokano, kameng ken saan ti GF, iti Filipinas ken iti abrod.

Mainaig itoy, ipalagip ti GF Awards Committee a Pebrero 29, 2012 ti deadline ti panagawat kadagiti nominasion para iti Pedro Bucaneg Award, Leona Florentino Award, ken Cornelio Valdez Award.

Kasta met nga ipalagip ti Mrs. GUMIL Filipinas Popularity Contest 2012 AdHoc Committee kadagiti amin a GUMIL chapter a masapul ti panangipatakder ti tunggal chapter iti pakisalipna. Maangay ti umuna ken maudi a canvassing iti umuna a rabii ti komperensia.

Para iti dadduma pay a damag maipanggep iti GUMIL Filipinas ken iti nasao a komperensia, bisitaen ti www.gumilfilipinas.com, ti opisial a website ti gunglo; wenno no adda saludsod, ag-e-mail iti djuna_alcantara@yahoo.com. (GF Secretariat)

This entry was posted in ilokano writers, writers, writers festival, writers' group and tagged , , , . Bookmark the permalink.



Leave a Reply

Your email address will not be published. Required fields are marked *